إذا انت تستخدم لاب توب خارج البيت، أكيد دايم يراودك رعب انه ممكن ينسرق وما تقدر تسترجعه بعد كذا. طبعا فيه سمعنا كثير عن برامج لإستعادة الجوالات وحتى أبل حطت هالميزة هذي بجميع أجهزة الآي فون… لكن صراحة الفكرة هذي جديدة على الكمبيوترات المكتبية.

البرنامج اسمه PreyProject. وواضح انه طازة وجديد وحتى الإصدار حقه لا يزال 0.5 … لكن بنفس الوقت فيه له قصص نجاح وكثير ناس استعادت اجهزتهم عن طريقه!

البرنامج له مزايا جدا رائعة، منها:

• تحديد موقع الجهاز المسروق.
• تصوير تلقائي عن طريق الكاميرا علشان تعرف اللي سارق جهازك
• إمكانية قفل الجهاز عن بعد لحماية ملفاتك وصورك الشخصية.
• إتصال تلقائي بالشبكات اللاسلكية المفتوحة حول الجهاز المسروق (لإرسال البيانات لك)
• خفيف جدا على الجهاز وغير محسوس فيه
• تسجيل لجميع تحركات الحرامي!
• وغيرها من المزايا

فكرة البرنامج بسيطة جدا جدا. اللي عليك انك تسويه خطوات بسيطة وما تاخذ منك دقايق، وراح تزيد نسبة ان جهازك يرجع لك لو لا قدّر الله وانسرق بشكل كبير جدا. الخطوات كذا:

1. حمّل البرنامج على جهازك (يدعم: ويندوز ، أبل ، جوالات الآيفون ، جوالات قوقل أندرويد ، لينيكس … يعني كل شيء!!!)
2. راح يبدأ معك الست أب، أول مرة راح يطلب منك بياناتك.
3. بعد ما تخلص بياناتك وتخلص تثبيت البرنامج، راح يجيك إيميل تأكيد.
4. سو تأكيد للإيميل، راح ياخذك لموقعهم اللي هو بكل بساطة شاشة التحكم.
5. لو لا قدّر الله انسرق جهازك، تدخل الموقع وتحط انه Missing (يعني مفقود) وراح تجيك تقارير عنه وصور اللي سارقه.
6. إزهم على الشرطة (يجيب الله مطر) وقل لهم الحرامي هذا مكانه، اقبضوا عليه!
7. قصوا ايده!

وهنا فيديو شرح بسيط للبرنامج.

المصدر والموقع الرسمي.

والله يحمينا واياكم من شر الحرامية